අඩි පනහක් හැටක් පමණට උස වැඩෙන
හැඩි දැඩි ගසක් වේ සරුවට පල දරන
වැඩියෙන් කොළ ගැවැස කොළ පැහැයෙන් දිලෙන
ගෙඩි ලස්සනයි දැකුමට ඇස පිය වඩන

හඳුනා ගන්න එක් වරිගෙකි මල් ගොරකා
පෙනෙනා අනෙක් වරිගය වේ රතු ගොරකා
කියනා තවත් වරිගෙකි එය එළ ගොරකා
වටිනා කමෙන් ඉහළය මේ සැම ගොරකා

ගෙඩි හිඟ වුනත් මල් අඩු නැති මල් ගොරකා
වැඩියෙන් මල් දරයි අඩු පාඩුව වළකා
පොඩි මල් දිලේ ගස වටකර සැම විටෙකා
ගෙඩි හිඟ වුණත් අගයක් ඇත මල් ගොරකා

කහ පැහැයෙන් දිලෙන එළ ගොරකා ගෙඩියේ
සුදු පාටක් රැඳී ඇත ඇතුළත මදයේ
රතු මද පිරුන සරු රතු ගොරකා ගෙඩියේ
දුටු විට ඇස පිනයි අන් සැමටම වැඩියේ

දාර දාර එක් වී හැඩවන ගොරකා
වාර නොමැත අගනා ඔසුවකි නිසැකා
සාර කරන එළවළු මාළු ද නොයෙකා
නෑර ගොරක ගත යුතුවේ සැම විටෙකා

ගෙඩිද කොළද මුල් පොතු බෙහෙතට ගැනෙන
අමිල ගුණය ඇති නො අඩුව රස රැඳුණ
රසය පිණිස රස කාරක ලෙස යොදන
බලනු මැනවි එහි ඇත අගයන් නිතින

ලේවල තෙල් නසන බලයක් ඇති ගොරකා
තරබාරුව මකයි සිරුරෙහි හැඩ සලකා
ගෙන දෙන සනීපය ඇති බාදක වළකා
අගයෙන් ඉහළ ඔසුවකි මේ සැම ගොරකා

ලේ වල සීනි අඩුකර ගෙන දේ සැපත
මේදය නසා වළකයි සිරුරෙහි විපත
මේ ලෙස සිතා බැලුවොත් විමසා අනත
ගොරකාවල ගුණය ගැන ඒකයි ඇත්ත

ගොරකාවලට වැඩියෙන් මිහිරිය වරකා
වරකාවලට වැඩියෙන් ගුණ දෙයි ගොරකා
සොඳිනා විමසුවොත් එහි ඇත ගුණ නොයෙකා
සලකා බලන විට වැටහෙයි එය නිසැකා