මයුරපාල යෝගය

රවි, මේෂ රාශියට උච්ච වේ. ඕනෑම ලග්නහිමියකුගේ කේන්දරයේ රවි, මේෂ රාශියේ වෙතොත් එය මයුරපාල යෝගය වෙයි. පරිවාර සේනා සහිත ඍජු අදහස් ප්‍රකාශ කරන මාන්නාධික, කිසිවකුට යටත් නොවන, පිරිසක් පාලනය කිරීමට හැකි නායකත්වයක් ලැබෙන කීර්තිමත් උද්‍යෝගිවන්ත අයකු මේ යෝගයෙන් බිහි කරයි.

උපේන්ද්‍ර යෝගය

රවි ඕනෑම ස්ථානයක සිංහ රාශියේ වෙතොත් එය උපේන්ද්‍ර යෝගයයි. ප්‍රදේශයට, පිරිසකට නායකයකු වන අතර පාලනයෙහි දක්ෂවේ. ඥාති වර්ගයා අතර ප්‍රධාන වේ. විශ්වාසවන්ත ඍජු අදහස් ඇත.

යස යෝගය

චන්ද්‍රයාගේ උච්ච රාශිය වූ වෘෂභ රාශිගතව සඳු සිටී නම් යස යෝගය යෙදේ. යස යෝග හිමියා ශෝභමාන බුද්ධිමත් තිර අදිටනකින් යුතු අයෙකි. මානුෂිකය. උසස් රැකියා ලාභ හිමිය. කලාත්මක අදහස් ඇත. භූමිලාභ ඇත. ආයුබල සහිතය.

කුලීර යෝගය

චන්ද්‍රයාගේ ස්වක්ෂේත්‍ර රාශිය වූ කටක රාශිගතව සඳු සිටියේ නම් එය කුලීර යෝගයයි. මේ යෝගය හිමි අය ප්‍රසන්නය. මෘදු මොළොක් ගති ඇති යහපත් කල්පනාවෙන් යුක්ත අය වනු ඇත. සිත් උණුවන සුලුය. කාරුණිකය. චංචල අදහස් ඇති කරයි. ඡ්‍යොතිෂයට ඇලුම් කරන මවට ළැදි අයකු වනු ඇත.