මිථුන, කටක, කන්‍යා, වෘශ්චික, ධනු, මීන ලග්නවලට මාලවී යෝගයෙන් දියුණුව සහ වාසනාව

මේෂ, වෘෂභ, සිංහ, තුලා, මකර, කුම්භ ලග්නවලට මහෞෂධ යෝගයෙන් ලැබීම් සහ ගෞරවය

සියලුම ලග්නවලට ගුරු සිකුරු පරිවර්තන යෝගයෙන් සුවිශේෂී පලාපල

 

මේෂ ලග්නය

ලාභ ගරු සැලකිලි

 

පෙබරවාරි මාසයේදී කරන කියන කටයුතු දියුණුවනවා මෙන්ම ලැබීම් සහ ගරු සැලකිලිද හිමියි.

ගෘහ ජීවිතය - ලාභ ඇතිවන අතර වැයවීම් සමාන ලෙස ඇති වේ. සිතේ අසතුටුකම්ද යෙදේ. යහපත් ගමන් බිමන් යෙදෙන අතර විදේශ ගමන් සාර්ථක වීමටද ඉඩකඩ සැලසේ. ජලයෙන් අගුණකමක්ද පදිංචි ස්ථානයේ බාධක ගැටලු මතුවීමටද ඉඩ ඇත. සතුරු කරදර ආදි කරුණුද යෙදිය හැකිය. උත්සාහයෙන් කටයුතු කිරීමෙන් සියලු කටයුතු සාර්ථක කරගත හැකිය. විලාසිතාවලින් තොරව තීක්ෂණ ලෙස කටයුතු කළ යුතුය. සහෝදර සහෝදරියන් සමඟ හෝ පාරම්පරික ඥාතීන් සමඟ ආරාවුල් ඇතිවීමද ඉඩ ඇත. කතාබස් කිරීමේදී ඉවසිලිමත් විය යුතුය. සෙනසුරු දසා තිබෙන අය වංචාකාරයන්ගෙන් සොරසතුරන්ගෙන් අනතුරු පීඩාවලින් ආරක්ෂා විය යුතුය.

රැකියාව හා ධනය - රැකියා කටයුතුවලට සුබය. රැකියා ලැබීම් ධන ලාභ ලැබිය හැකිය. සමාජ තත්ත්වය දියුණු කරයි. ලිපි ලේඛන කටයුතුªවලින් ලාබ ප්‍රයෝජන ගෙන දේ.

අධ්‍යාපනය - අධ්‍යාපන යෝග මෙන්ම රාජයෝග බලයද යෙදේ. අධ්‍යාපන කටයුතු සාර්ථක කර ගත හැකිය.

ශරීර සෞඛ්‍යය - ශරීර සෞඛ්‍යට තරමක් අහිතකර වේ. උදරගත රෝග පීඩා යෙදිය හැකිය. ශරීර ශක්තිය අඩුවිය හැයිය. උදාසීන ගති ඇතිවේ. ස්ත්‍රි පක්ෂයෙන් කරදර ඇති වේ. කන්වල හෝ අත්වල අමාරු ඇතිවිය හැකිය. ගිහි සැප අඩුවේ. තමා බලාපොරොත්තු නොවන දේවල් ආශ්‍රය කරන අයගෙන් සිදු විය හැකිය.

ජය අංක 9 ජය වර්ණය - නිල්, ජය දිනය - සිකුරාදා

 

වෘෂභ ලග්නය

ලැබීම් වැඩිවේ

මේ මාසය තුළ ලග්නාධිපතිගේ සහ අයස්ථානාධිපතිගේ පරිවර්තන යෝගය පවතී. එය සුබයි.

ගෘහ ජීවිතය - පිරිසුදු සිතින් සමාජ සේවයට යොමු වීමෙන් ධනය මෙන්ම පිරිස් බලය ඇතිවේ. සිතට සතුට ගෙන දේ. අන් අයගෙන් උදව් උපකාරද ලැබිය හැකිය. මහන්සිය අඩු වේ. නීච භංග රාජයෝග බලය ද පවති. එය පෙබරවාරි 27 සිට මැයි 7 දක්වා බලපවත්වයි. ඉඩකඩම් භූමි ලාභ ගේ දොර ලබන බලයක් පවතී. ස්ථාන මාරුද යෙදීමට ඉඩ ඇත. ගෙදර දොර ජීවිතය යහපත් වේ. හිතන දේ එවේලේම එලෙසම ක්‍රියාවට නැංවීමට උත්සාහ ගන්නා අතර පසුතැවීම්වලට කැමති නැත. කුජ දශා තිබේනම් විවාහක අයගේ පවුල්වල මත ගැටුම් ඇතිවීමටද ඉඩ ඇත. රාහු දසා ඇති අයට කොන්ත්‍රාත් ව්‍යාපාර ආදි කටයුතුවලින් ඉහළ පල ලැබේ.

රැකියාව සහ ධනය - බලතල හිමිකම් රැකියා ලැබීමට මෙන්ම රැකියාවල උසස්වීම් ද ඇති වේ. තමාම කරන ව්‍යාපාර කටයුතු ද දියුණු වේ. සස යෝග බලය ද පවතී. රැකියා අංශවල කැපී පෙනීම ද ඇතිවේ. රැකියා උදෙසා විදේශ ගමන් ද යෙදිය හැකිය. ආදායම් මාර්ග ධන ලැබීම් ඇතිවේ. වරින්වර අඩුවැඩිවීම් ඇති වුවද අඩුපාඩුවලින් තොරව ධනය ලැබේ.

අධ්‍යාපනය - ඉගෙනීම් කටයුතු සාර්ථක වේ. බාධක මධ්‍යයේ වුවද ඥාන ශක්තිය ධාරණ ශක්තිය බලවත් කරගෙන අධ්‍යාපන කටයුතු දියුණුූ කරගත හැකිය. ඉතා හෙමින් වුවත් ක්‍රමානුකූලව තම කටයුතු ඉටුකර ගැනීමට අවස්ථාව උදාවේ.

ශරීර සෞඛ්‍යය - දත්වල අමාරු, හිසේ පීඩා ඇතිවිය හැකිය. සමහර අවස්ථාවල මානසික පීඩා ද ඇති විය හැකිය. උදරගත රෝග ද යෙදිය හැකිය. සතුරු පීඩා ඇති වීමට ඉඩ ඇත.

ජය අංකය - 6, 7 ජයවර්ණය -කහ-නිල් ජය දින - බ්‍රහස්පතින්දා

 

මිථුන ලග්නය

විදේශ ගමන්

පෙබරවාරි 11 සිට බුධ ත්‍රිකෝණ බලයෙන් යුතුය. මෙලොව, පරලොව, දෙලොව උදෙසාම ගූණවත් කමින් යුතුව ආගම දහමට ළැදිව කටයුතු කරයි

ගෘහ ජීවිතය - . ගෙදර දොර දියුණුව මෙන්ම වාසස්ථාන ලැබීම් ද ඇති වේ. ජීවිතය යහපත් වේ. වන්දනා ගමන් විදේශ ගමන් යෙදිය හැකිය. ගුණ නුවණ දියුණු ූවේ. මාලවී යෝගය ද පවතී. සමිති සමාගම්වල නිලතල ලැබීමට ද භාග්‍යය උදා වේ. වාසනාවන්ත පෙනුම, ප්‍රසන්න ගති ඉරියව් ද ඇති වේ. කලාකාමී සමාජීශීලි බව ඇති වේ. අනතුරු පීඩාවලට ලක් නොවී කල්පනාකාරිව ගෘහ ජීවිතය ගත කළ යුතුය. කරදර බාධා මධ්‍යයේ වුවද තම කටයුතුවල ඇති උනන්දුව අඩු නොකර ගෙන කටයුතු කළ හැකිය. ප්‍රමාදවීම් ඇති වුවත් පිළිවෙළකට වැඩ කළ හැකිය. පිටස්තර අය සමඟ වැඩිපුර සම්බන්ධය ද උදව් උපකාර ද ලැබේ. තමාට තමා ම ය යන සිතුවිල්ල ඇතිව කිසිවකුට යටහත් පහත් නොවී තම කටයුතු කර ගැනීම වාසනාව ධෛර්යය තිබේ. අනුන්ට උපකාර කිරීමට යාමෙන් අපහසුතාවයන්ට පත්විය හැකිය.

රැකියාව හා ධනය - රැකියාවට ප්‍රධාන තැන දී කටයුතු කරයි. සැහැල්ලුවෙන් විනෝදයෙන් රැකියා කටයුතු කළ හැකිය. ව්‍යාපාර කටයුතු ද දියුණුූ වේ. වියදම් ආදිය පාලනය වේ. කරන කටයුතු රැකියා ආදියේ යම් ප්‍රමාදවීම් ඇති වුවත් එයින් එතරම් අහිතකර තත්ත්වයක් ඇති නොවේ. උත්සාහයෙන් දියුණුව ඇතිකර ගත හැකිය.

අධ්‍යාපනය - ඥාන ශක්තිය හා ධාරණ ශක්තිය ඇතිවන අතර ඉගෙනීමට සුබදායක වේ. විදේශ ඉගෙනීම්වලට විදේශ වන්දනා ගමන්වලට ද කරුණු සැලසේ. උසස් අධ්‍යාපනය ලැබීමට ද භාග්‍යය ඇත.

ශරීර සෞඛ්‍යය - ලේ දෝෂ රෝග ඇති විය හැකිය. අනතතුරු පීඩා ගැන සැලකිලිමත් විය යුතුය. රෝග පීඩා හේතුවෙන් ධනය වැයවීමට ද ඉඩ ඇත. උදරයේ ඉන්ද්‍රියන්ගේ පීඩාකාරි තත්ත්වය ද ඇති වේ. තුවාල වීම් ගැනද සැලකිලිමත් විය යුතුය. සෙම් රෝගවල බලපෑම ද ඇති වේ.

ජය අංකය - 05, ජයවර්ණය - කොළ, කහ, ජය දින - බදාදා, බ්‍රහස්පතින්දා

 

කටක ලග්නය

පෙර පින් මතු කරයි

පෙර පින් බලය මතුකරමින් බොහෝ කටයුතු සාර්ථක වන අතර උරුම හිමිකම් ලැබීමට ද වාසනාව මතුකරන මාසයකි.

ගෘහ ජීවිතය - විදේශ ගමන් සහ වන්දනා ගමන් ද යෙදිය හැකිය. රවි දශා ලබා තිබෙන අය පරෙස්සමෙන් කටයුතු කළ යුතුය. නැති නම් මිල මුදල් දේපළ නාස්ති වී යාමට ඉඩ තිබේ. යුගදිවියේ කරදර බාධා ද ඇති කරයි. පොළොවෙන් ලැබීම් ඇති වුවත් සතුට සහනය අඩුවේ. එහෙත් අන් අයගේ ගෞරවයට පාත්‍ර වේ. ආගම, දහමට, සමාජසේවා කටයුතුවලට, පුණ්‍යස්ථානවල දියුණුවට කටයුතු කිරීමට ද සිත යොමු වේ. සෙනසුරු දශා අතුරු දශා විදශා තිබෙන අයට අෂ්ටම ඒරාෂ්ටකය පවතී. ඒ අනුව සිතේ බිය ඇතිවී කල් ඇතිවම කරදර බාධාවලින් නිදහස්වීමට ආරක්ෂාවීමට උත්සාහ දරයි. එය යහපත් වේ. අධික විනෝදය නිසා අපහසුතා ඇති වේ.

රැකියාව සහ ධනය - ධනය අතින් හිඟපාඩු නොවේ. නිදහස් ව්‍යාපාර කටයුතුද දියුණුූ වේ. රැකියා සඳහා දුර බැහැර ගමන්ද ඇති වේ. මේ මාසයේ රැකියා කටයුතුවලට යහපත් වේ.

අධ්‍යාපනය - උසස් අධ්‍යාපනයට වරම් ලැබිය හැකිය. ඥාන ශක්තිය ධාරණ ශක්තිය වර්ධනය වේ. ව්‍යාපාර අංශවලට අදාළ වන ඉගෙනීම් කටයුතු ද සාර්ථක වේ. නීතිය ගණිත මිනිත කාර්මික අංශවලින් ඉගෙනීමට යහපත්ය.

ශරීර සෞඛ්‍යය - වාත පීඩා, ගුද මාර්ගවල රෝග මෙන්ම උණ, සෙම් රෝග පීඩා යෙදිය හැකිය. රවි දශා අතුරු දශා විදශා තිබෙන අය ගින්නෙන් විදුලියෙන් ආරක්ෂා විය යුතුය. නහරගත රෝග පීඩාද යෙදිය හැකිය.

ජය අංකය 7, 9, ජයවර්ණය - සුදු, කහ, ජය දිනය - අඟහරුවාදා , සිකුරාදා

 

සිංහ ලග්නය

අතමිට සරුවේ

උනන්දුව, උත්සාහය ඇතිව වැඩකටයුතු කිරීමට හැකියාව ඇති වන මාසයකි.

ගෘහ ජීවිතය - ස්ථිර දේපළ ලැබීමට ද භාග්‍ය උදා වේ. විවාහක අයගේ පවුල්වල සාමයට බාධාවීමට ද ඉඩ තිබේ. ඥාතින් අතර මතභේද ඇතිවීම මෙන්ම අනවශ්‍ය අය ආශ්‍රය කිරීමෙන් තම කටයුතුවලට කරදර පාඩු ඇති විය හැකි බැවින් අවධානයෙන් සිටීමෙන් බොහෝදුරට ආරක්ෂා විය හැකිය. ආලය, ආදරය සම්බන්ධ කටයුතුවලටද සිත ඇදීයයි. කලින් සූදානම් වී ක්‍රමානුකූලව වැඩ කටයුතු කිරීමෙන් සාර්ථක විය හැකිය. සෙනසුරුගෙන් සස යෝගයද යෙදී ඇත. සමාජ කටයුතුවල යෙදීමටද සිත යොමුවේ. රාහු දශා අතුරු දශා විදශා තිබෙන අය ඉවසීමෙන් කටයුතු කළ යුතුය. නැතිනම් කරදරබාධා, සතුරු පීඩා යෙදේ.

රැකියාව සහ ධනය - රැකියා ව්‍යාපාර කටයුතුවලට යහපත් මාසයකි. ගෞරවයෙන් යුතු රැකියා ලැබීමටද දියුණුව මෙන්ම උසස්වීම්ද ලැබේ. ආදායම් ධනය ලැබීමට තරමක් වෙහෙසවීමට සිදු වුවත් අතමිට සරුවේ. වෙළෙඳ ව්‍යාපාර කටයුතුද සාර්ථක වේ.

අධ්‍යාපනය - ඉගෙනීමට දක්ෂතා ඇති වේ. අධ්‍යාපන කටයුතු සාර්ථක වේ. උගත් දෙයින් පල ප්‍රයෝජන ලැබිය හැකිය. පොතපත ලිවීමට, ඇති දැනුම දියුණුූ කර ගැනීමේ කටයුතුවලට මෙන්ම ගණිත මිනිත කටයුතුවලටද සිත යොමු කර දියුණූු කර ගත හැකිය.

ශරීර සෞඛ්‍යය - සතුරු කරදර නිසා අලාභ හානි ඇති විය හැකිය. උදරගත රෝග පීඩා, ඇස්වල අමාරු යෙදිය හැකිය. රෝග පීඩා නිසා වියදම් ද ඇති වේ. අර්ශස් වැනි උෂ්ණ රෝග ද ඇති විය හැකිය.

ජය අංකය - 05, ජය වර්ණය - රතු

ජය දිනය - බ්‍රහස්පතින්දා

 

කන්‍යා ලග්නය

ඍජු ප්‍රතිපත්ති ඇතිවේ

මේ මාසයේ හොඳ නරක තෝරා බේරා ගෙන කටයුතු කළ හැකිය. හැම දේකටම නව පණක්දී කටයුතු කිරීමට සිත යොමු වේ.

ගෘහ ජීවිතය - කලා, සාහිත්‍ය, නාට්‍ය අංශවල නිරත අයට සහජ දක්ෂකම් ඔපමට්ටම් කර දැක්විය හැකිය. සමාජය ඉදිරියට ගොස් කටයුතු කිරීමට ප්‍රබල ලෙස ශක්තිය ඇති වේ. වන්දනා ආදි ගමන් බිමන් යෙදේ. මාලවී යෝගයද යෙදී තිබේ. ක්‍රියාශූරත්වයෙන් කටයුතු කළ හැකිය. කරදර බාධක අභිබවා ජයග්‍රහණ උදාකර ගැනීමට වාසනාව භාග්‍යය උදා වේ. උපායශීලිව කටයුතු කළ හැකිය. පේ‍්‍රම සම්බන්ධ ද ඇති වේ. ආගම දහමට භක්තිය විශ්වාසය යෙදෙන අතර උසස් දැනුම ද ඇති වේ. විවාහ අපේක්ෂිත අයට යහපත් මංගල යෝග ද උදා වේ. තම දියුණුවට වැඩි හිටියන්ගෙන් උදව් උපකාර ලැබේ. ගුරු සිකුරුගෙන් යහපත් පරිවර්තන යෝගයක්ද පවතී. ආත්ම ගෞරවය ආරක්ෂා කර ගනී. ප්‍රතිපත්තිගරුකව කටයුතු කළ හැකිය.

රැකියාව සහ ධනය - රැකියා කටයුතුවලට සුබදායකය. බාධක කරදර ඇති නොවේ. රැකියා අංශ දියුණු කර ගැනීමට ද උනන්දුව ඇතිවේ. හවුල් ව්‍යාපාර කටයුතු ද සාර්ථක වේ. තම හැකියාවන් දියුණුවී ප්‍රසිද්ධිය, ධනය, ආදායම් මාර්ග දියුණුූ වේ.

අධ්‍යාපනය - අධ්‍යාපන කටයුතුවලට තරමක් බාධක ඇති වේ. උනන්දුව, උත්සාහය, ඇතිකරගත් විට ජයගත හැකිය. ගුරු දශා තිබේනම් ඉගෙනීමට යහපත් වේ. ව්‍යාපාර, ගණිත අංශවලින් ඉගෙනීම් කරන අයට යහපතය.

ශරීර සෞඛ්‍යය

රෝග පීඩා ගැන හිතේ බිය ඇති වේ. නහරගත පීඩා හෝ ශරීර අභ්‍යන්තර සියුම් පීඩා ඇතිවීමට ඉඩ තිබේ. හිතට පීඩා ඇතිවේ. රෝග පීඩාවලට ඔරොත්තු දෙන ශක්තිය පවතී.

ජය අංක 7, 5 ජය වර්ණ - සුදු, කහ,

ජය දින - බදාදා, සිකුරාදා

 

තුලා ලග්නය

මංගල යෝග

 

සුබ අසුබ මිශ්‍රව ලැබේ. හය අට අධිපතීන් වන ගුරු සහ සිකුරු පරිවර්තනය වී සරලා, විමලා යෝග සැදී ඇත. ඒ අනුව මේ මාසය තුළ ලග්නයට හැම අතින්ම යහපත උදාවනු ඇත.

ගෘහ ජීවිතය - කරන කියන කටයුතුවලට ද සුබය. ලැබීම් ද ඇති වේ. බලාපොරොත්තු ඉටු වේ. අවිවාහක අයට මංගල කටයුතු ද උදා වේ. උපායශීලිව කටයුතු කළ හැකිය. පළපුරුද්ද අත්දැකීම් තුළින් දක්ෂතා විදහා දැක්විය හැකිය. අඩුපාඩු ඇති නොවන ලෙස නිවැරැදිව කටයුතු කිරීමට හැකියාව තිබේ.

සාහිත්‍යය, නාට්‍යය, කවිය, කලාව ආදි අංශවල දියුණුව ඇතිවේ. ඒවායේ නිරත අයට යහපත් වේ. අනාගතය උදෙසා කටයුතු කර ගැනීමට ද උත්සුක වෙයි. කොතැනදීත් වෙනසක් නැතිව කටයුතු කළ හැකිය. ගෙදර දොර දියුණුව ද ඇති වේ. රාහු දශා ඇති අය අලුත් අලුත් දේවල්වලට යොමු වේ.

රැකියාව සහ ධනය - මිලමුදල් ලාභ ඇතිවේ. රැකියා තනතුරු ලැබීම් මෙන්ම ඒවායේ දියුණුව ද ඇති වේ. පෙබරවාරි මාසයේ බුධ පස්වැන්නේ යෙදීමෙන් රාජයෝගයක් ද උදා වේ. රැකියාව, මිල මුදල් ඉතිරි කිරීමට වගබලා ගනී.

අධ්‍යාපනය - ශාස්ත්‍රිය අංශවලට සුබයි. ඉගෙනීමට ආශාව ඇතිවේ. යාන්ත්‍රික කාර්මික අංශවල ඉගෙනීම්වලටද යහපත් වේ. ඉගෙනීමට හා ඉගැන්වීමටද දක්ෂතා ඇතිවේ.

ශරීරික සෞඛ්‍යය - විශේෂයෙන් ඇස්වහ, කටවහ දෝෂ ඇති වේ. උදරාබාධ ද ඇති විය හැකිය. ස්ත්‍රී පක්ෂයෙන් කරදර ඇති වේ. ශරීර අභ්‍යන්තර රෝගපීඩා ද යෙදිය හැකිය.

ජය අංකය - 1,2,4, ජය වර්ණය - සුදු, රතු , ජය දිනය - ඉරිදා, සඳුදා

 

වෘශ්චික ලග්නය

යහපත් යෝග බල ඇත

 

පස්වැන්න අධිපති ගුරු සහ හත්වැන්න අධිපති සිකුරු අතර මහා පරිවර්තන යෝගයක් ද ඇත. පරිවර්තන යෝග බලය අනුව කුජ අටේ යෙදීමෙන් වන අසුබපල බොහෝදුරට අඩුවේ. එය යහපත් පිහිටීමකි.

ගෘහ ජීවිතය - සමාජයේ බොහෝ දෙනාගේ විශ්වාසය දිනාගෙන ගුණ යහපත්කමින් කටයුතු කළ හැක. යහපත් මිතුරන් ඇතිවන අතර ඥාතින්ගෙන් කරදර ඇතිවේ. කලබලයෙන් තොරව සිය කටයුතු කරගෙන යාමට හැකිවේ. යුගදිවිය ගැන ගෞරවයෙන් යුක්තව කටයුතු කරයි. අවිවාහක අයට ගුණ යහපත් සහකරුවන්, සහකාරියන් ලැබේ. දියුණුවට බාධා නොවේ. සෙනසුරුගෙන් සස යෝගය ද යෙදී ඇත. ආගම දහමට ලැදිවන අතර පිරිස් බලය ඇති වේ. සත්‍යවාදී ලෙස කටයුතු කරයි. හිත පිරිසුදුය. ලැබීම් ද ඇතිවන අතර ගෙදර දොර දියුණුවද යෙදේ. විදේශ ගමන් දුර ගමන් යෙදිය හැකිය. රාජ්‍ය අනුග්‍රහය ලැබීමට ද ඉඩ ප්‍රස්තා ඇති වේ. යහපත සෙත උදා වේ.

රැකියාව සහ ධනය - රැකියා අංශ ගැන උනන්දුව, උත්සාහය පවතින අතර ඒ පිළිබද දැනුම අවබෝධය වැඩිකර ගැනීමටද උත්සාහ ගනී. ව්‍යාපාර කටයුතු කරන අයගේ එම කටයුතු දියුණුවූ වේ. කලාවට විලාසිතාවන්ට අදාළ ව්‍යාපාර කටයුතුවලින් වැඩි ලාභ ප්‍රයෝජන ලැබිය හැකිය. ආදායම් තත්ත්වය, ධනය යහපත් වේ.

අධ්‍යාපනය - ඥාන ශක්තිය බලවත් වේ. ඉගෙනීමට හැකියාව ඇතිවේ. ගණිත මිනිත නීතිය කාර්මික යන අංශවල ඉගෙනීම්ද දියුණුූකරගත හැක. සංගීතය වැනි කලා අංශවල ඉගෙනීම්ද සාර්ථක ලෙස දියුණුූ කරගත හැකිය. ඒ අංශවලින් දියුණුව ප්‍රසිද්ධිය ඇති වේ.

ශරීර සෞඛ්‍යය - ලේ දෝෂ ඇති විය හැකිය. වැටීම් තැළීම් හදිසි අනතුරු පීඩා ගැන සැලකිලිමත් විය යුතුය. රහස් කටයුතුවලින් අනතුරු ඇතිවීමට ඉඩ ඇත. උදරය ආශි‍්‍රත රෝග පීඩා ගැන ද සැලකිලිමත් විය යුතුය.

ජය අංකය - 4, 9 ජය වර්ණ - කහ, රතු

ජය දින - ඉරිදා, සඳුදා

 

ධනු ලග්නය

සිතුම් පැතුම් සාර්ථක වේ

සිකුරුගෙන් මාලවී යෝගය යෙදී ඇත. සිකුරුත් ගුරුත් අතර පරිවර්තන යෝගයක් ද පවතී. එම යෝගය එතරම්ම සුබ නැත. සාමාන්‍ය කරදර බාධා ඇති කරයි. .

ගෘහ ජීවිතය - ඥාතින්ගෙන් සතුරු කරදර ඊර්ෂ්‍යාකාරකම් යෙදීමෙන් දියුණුවට බාධා ඇති විය හැකිය. මිතුරන්ගෙන් උදව් උපකාර ලැබිය හැකිය. වෙසෙන පරිසරය සතුටු දායක නොවීමට ද ඉඩ තිබේ. විවාහක අයගේ ජීවිතයේ සතුට, සැපත අඩු විය හැකිය. දරුවන්ටද රෝග පීඩා යෙදිය හැකිය. උත්සාහය, එඩිතරකම, උනන්දුව අනුව සතුරු කරදර රෝග පීඩා මර්දනය කරගත හැකිය. ආගම දහමට, සමාජයට ළැදිකම අනුව කීර්තිය, ප්‍රසිද්ධිය ලැබේ. බොහෝදුරට සිතුම් පැතුම් සාර්ථක වේ. කලාකාමිත්වය, සමාජශීලි බව, සත්‍යවාදී බව ඇති කරයි. යානවාහන වැනි පහසුකම් ඇති වේ.

රැකියාව සහ ධනය - ආර්ථිකයට දියුණුවට වරින්වර බාධා ඇති විය හැකිමුත් මහන්සි නොවී ධනය ඉපයීමටත් අන්සතු ධනය ලැබීමටත් ඉඩ ඇත. රැකියා අංශවල දියුණුව යෙදේ. එක වැඩක් වැරදී ගියහොත් වෙන වැඩක් පටන්ගෙන කරයි. ලිවීම වැනි දේවලින්ද දියුණූුව යෙදේ. ස්වයංරැකියා වෙළෙඳාම් ආදිය දියුණූු වේ.

අධ්‍යාපනය - විද්‍යා තාක්ෂණ, ශාස්ත්‍රීය අංශයේ ඉගෙනීම්ද සාර්ථක වේ. ගණිත මිනිත කාර්මික නීති අංශවලට සහජ දක්ෂතා ඇති වේ.

ශරීර සෞඛ්‍යය - කල් අල්ලන සෙම් රෝග පීඩා ඇති විය හැකිය. ශරීර සෞඛ්‍යය පිළිබඳ දැඩි අවධානයෙන් කටයුතු කර ආහාරපානාදියෙන් සෞඛ්‍යය රැකගනී. මුත්‍රා ආශි‍්‍රත උෂ්ණ රෝග පීඩා ද ඇති විය හැකිය. ජලයෙන් අගුණ ඇති වේ. රුධිරගත රෝග ද ඇති විය හැකිය.

ජය අංකය - 3,5, 6 ජය වර්ණ - කොළ, සුදු

ජය දින - බදාදා, සිකුරාදා

 

මකර ලග්නය

ජයග්‍රහණ ලබයි

 

තුන්වැන්නාධිපති ගුරු සහ පස්වැන්නාධිපති සිකුරු අතර පරිවර්තන යෝගයක්ද පවතී. එම යෝගය ආත්මාර්ථයට සහ පරාර්ථයට සහ දෙකටම බලපවත්වයි. ලග්න ඒරාෂ්ටකයේ අවසාන කොටස ද පවතී.

ගෘහ ජීවිතය - ස්ථිර ප්‍රතිපත්තිවලින් යුතුවන අතර ආත්ම ගෞරවය ආරක්ෂා කරගෙන කටයුතු කළ හැකිය. අසාධාරණ අයුතු සහගත කටයුතුවල නොයෙදේ. යුගදිවියේ සැප සතුට අඩු විය හැකිය. ආගමික සමාජ සේවා කටයුතුවල යෙදීමෙන් ප්‍රසිද්ධිය ඇති වේ. යහපත් මිතුරන්ගෙන් උදව් උපකාර ලැබේ. සාර්ථක ගමන් බිමන් යෙදේ. ක්‍රමානුකූලව සිතා බලා වැඩ කටයුතු කිරිම නිසා සාර්ථක ප්‍රතිඵල අත්කර ගැනීමට හැකිවේ. රැකියාව සහ ධනය - යහපත් ආර්ථික තත්ත්වයන් ඇති වේ. ඉතිරි කිරීම් ගැන අවධානයෙන් කටයුතු කරයි. බාධක ඇති වුවත් ධන මාර්ග දියුණුූ කරගත හැකිය. රැකි රක්ෂා ව්‍යාපාරාදී කටයුතුවල දියුණුව ඇතිවේ. මුදල් යෙදීම් කරන ව්‍යාපාර කටයුතුවලින් ස්වං රැකියාවලින් ජය ලැබිය හැකිය.

අධ්‍යාපනය - ඥාන ශක්තිය, ධාරණ ශක්තිය බලවත්. ඉගෙනීමට දක්ෂතා ඇතිවේ. ගණිත මිනිත නීතිය කාර්මික අංශවල සහජ දැනුම ඇතිවේ. සංගීත, කලා, සෞන්දර්ය අංශවල ඉගෙනීම්වලටද යහපත් වේ. බාධක මධ්‍යයේ වුවත් උසස් ඉගෙනීම් දියුණුූ කරගත හැකිය.

ශරීර සෞඛ්‍ය - රෝග පීඩා නිසා තරමක අපහසුතා ඇති විය හැකිය. හිසේ අමාරු, උදරාබාධ මෙන්ම ගර්භාෂගත පීඩාවන්, උගුරේ දත්වල ඇස්වල අමාරු ද ඇතිවිය හැකිය.

ජය අංක - 6, 8, 9 ජය වර්ණ - රතු, නිල්

ජය දින - අඟහරුවාදා, සිකුරාදා

 

කුම්භ ලග්නය

කාගේත් සිත් ගනී

ගුරු සහ සිකුරු අතර මහා පරිවර්තන යෝගයක් යහපත්ව පවතී. කුම්භයට සිකුරු යෝග කාරක වේ. සෙනසුරුගෙන් සසයෝගය ද යෙදී ඇත. ලග්න ඒරාෂ්ටකයේ බලය අඩුය.

ගෘහ ජීවිතය - අදහස් වෙනස් නොකර ස්ථිරව කටයුතු කළ හැකිය. පලපුරුද්ද අත්දැකීම් තුළින් නිසියාකාරව වැඩ කටයුතු කිරීමේ හැකියාව ඇතිවේ. කාගෙත් සිත් ආකර්ෂණය කළ හැකිය. නිලතල ආදිය හිමිවේ. යහපත් මාසයකි. හැම දේකටම පලදීම ඇතිවේ. කලාත්මක මෙන්ම ගුප්ත අංශවලට ද කැමැත්ත ඇති වේ. ගෙදර දොර මෙන්ම දරුවන් ගැන ද උනන්දුවෙන් කටයතු කරයි. ගමන් බිමන් ස්ථාන මාරු ද ඇති විය හැකිය. ඥාති මිත්‍රාදීන් සමඟ මතබේද ඇති විය හැකිය. රාහු දශා අතුරු දශා විදශා තිබෙන අයට සුබ නැත. වියදම් වැඩිවෙයි. යුගදිවියේ ප්‍රශ්න ගැටලු ඇති වේ. කල්පනා කාරිව කටයුතු කළ යුතුය.

රැකියාව සහ ධනය

රාහු දසා නැති අයට සුබයි. ආර්ථික දුෂ්කරතා ඇති නොවේ. රැකියා කටයුතුවලට ද සුබය. ස්වයං රැකියාවලද දියුණුව ඇති කරයි. දේපළ දියුණුව ද ඇති කරයි.

අධ්‍යාපනය

ඉංජිනේරු කාර්මික නීතිය භාෂා ශාස්ත්‍ර ගණිත විවිධ ශිල්ප ශාස්ත්‍ර ඉගෙනීමට සහජ දක්ෂතා ඇති කර ගත හැකිය. අකීකරු බව ගුරුවරුන්ට ගරුසරු නොදැක්වීම වැනි කරුනු නිසා ඉගෙනීමට බාධා ඇතිවේ.

ශරීර සෞඛ්‍යය

ලේ දෝෂ රෝග, ඇස්වල අමාරු, හිසේ උෂ්ණ රෝග පීඩා, සෙම් රෝග උගුරේ අමාරුවද ඇති විය හැකිය.

ජය අංකය - 2,3,9 ජය වර්ණය - කහ, සුදු, රතු ජය දින - බ්‍රහස්පතින්දාස, සිකුරාදා

 

මීන ලග්නය

බාධක මැදින් දියුණුව

ලග්නාධිපති ගුරු සහ තුන අධිපති සිකුරු අතර පරිවර්තන යෝගය ද ඇත. සිකුරුගෙන් මාලවි යෝගය ද යෙදී ඇත.

ගෘහ ජීවිතය - පරිවර්තන යෝගය ආත්මාර්ථකාමී බවට වැඩිපුර බලපවත්වයි. බලාපොරාත්තු අසාර්ථක වීමෙන් හිතේ අසහනගති ද ඇති වේ. කීර්තිය, ප්‍රසිද්ධිය බලාපොරොත්තු වන අතර ලද දෙයින් සතුටු වීමට අසීරුය. ඥාතින්ගෙන් කරදර ඇති වේ. කරන යමක් අසාර්ථක වුවත් පසු නොබැස කටයුතු කිරීමට ශක්තිය තිබේ. ඒ මඟින් බාධක මැඩ ගෙන දියුණුව ළඟා කර ගත හැකිය. උසස් අයගෙන් උදව් උපකාර ලැබිය හැකිය. උපායශීලි බව නිසා සතුරන්ගෙන්ද ප්‍රබල ප්‍රයෝජන ලැබිය හැකිය. පදිංචිය වෙනස්වීම්වලටද ඉඩ තිබේ. ගමන් බිමන් නිසා අවිවේකය ඇති වේ.

රැකියාව හා ධනය - වෙළෙද ආදී ව්‍යාපාර කටයුතුවලට සුබදායක වේ. මහන්සියක් නැතිව ආදායම් ලැබිය හැකිය. ගේ දොර ඉඩකඩම් ගොඩනැඟිලි ද්‍රව්‍ය වෙළෙඳාම වැනි ව්‍යාපාර ද සාර්ථක වේ. ඥානය යොදවා කරන වැඩද පල දේ.

අධ්‍යාපනය - අධ්‍යාපන ශාස්ත්‍රීය කටයුතුවලට සුබයි. ඥාන ශක්තිය ධාරණ ශක්තිය පවතී. කාර්මික නීති අංශ, ගණිත අංශ සංගීතය, සාහිත්‍ය කලාව සෞන්දර්ය අංශ ඉගෙනීම්වලට ද සහජ දක්ෂතා පවතී.

ශරීර සෞඛ්‍යය - ලේ විෂවීම, බාහිර විෂ ශරීර ගතවීම වැනි රෝග යෙදිය හැකිය. කකුල්වල වාත වේදනා ඇති විය හැකිය. හිසේ සෙම් දෝෂ පීඩා ද ඇති වේ.

ජය අංකය - 1,3, 4 ජය වර්ණය - රතු, කහ

ජය දින - ඉරිදා, බ්‍රහස්පතින්දා