ජනවාරි 28 වැනි දින උදේ 07.03 ට මීන රාශියේ උච්ච වූ සිකුරු මැයි මස 31 දක්වා එම රැස තුළ නිවෘතව සහ වක්‍රව ක්ෂේත්‍ර ගණනාවක නව ප්‍රබෝධයක් ඇති කරවයි. රාහු ද මීන රාශියේ් සිකුරු සමඟ යෝග වීමත් පෙබරවාරි පළමුවැනිදා නෙප්චූන් සමඟ ග්‍රහ යුද්ධයෙන් සිකුරු ජය ලැබීමත් ඉදිරි කාලයේ සිකුරුගෙන් නියෝජනය කෙරෙන භෞතික කාම ලෝකයේ ලෞකික කාරණා රැසක ප්‍රතිඵල තීව්‍ර කරනු ඇත.

සන්නිවේදන , ජනමාධ්‍ය අංශවල ප්‍රබෝධයක් ද රහසිගත තොරතුරු, සැඟවුණු අපරාධ සම්බන්ධ සාක්ෂි ඉදිරියෙදී හෙළිවනු ඇත. දුම්රිය ඇතුළු ප්‍රවාහන සේවා සහ යාන වාහන සම්බන්ධ ආන්දෝලනාත්මක කාරණා කරළියට පැමිණෙන කාලයකි. ප්‍රවාහන ක්ෂේත්‍රයේ දියුණුවක් පෙන්වන අතර දුම්රිය ක්ෂේත්‍රයේ රහස් අනාවරණය කෙරෙන කාලයකි. නව ආයෝජන සමඟින් ප්‍රවාහන ඇතුළු රටේ මූල්‍ය කළමනාකරණය, මූල්‍ය ප්‍රතිපත්ති ආදි ක්ෂේත්‍ර ගණනාවක් නවීකරණය වන බව පෙනේ.

සංචාරක, වෙළෙඳ ව්‍යාපාර, නව නිර්මාණාත්මක කාර්‍යයන්, විදෙස් ආයෝජන, සියලු සෞන්දර්ය කලා ක්ෂේත්‍රයන්, වෙළෙඳ හා බැංකු, මැණික්, ස්වර්ණාභරණ, රෙදි පිළි ඇතුළු අලංකරණය සම්බන්ධ ක්ෂේත්‍රවල පිබිදීමක් ඇති වන අතර ඒ ක්ෂේත්‍රවලින් රටට ජගත් කීර්තියක් අත් කරගැනීමටත් හැකිවනු ඇත.

කෙසේ වෙතත් ප්‍රසිද්ධ ලේඛයෙකු, ග්‍රන්ථ කතුවරයෙකු හෝ චිත්‍ර ශිල්පියෙකු වැනි කලාකරුවකු සම්බන්ධ අසුබදායී පුවතක් ද අසන්නට ලැබෙනු ඇත. දුම්රිය හෝ ප්‍රවාහන අංශයක නීති විරෝධී හෝ අපරාධ කටයුත්තක් පිළිබඳව ද අසන්නට ලැබෙනු ඇත.

ඉදිරි කාලය තුල ජලයෙන් සිදුවන විපත් ගැන වෙනදාට වඩා වැඩි අවධානයක් යොමුකිරීම වැදගත් වන අතර ජලය පාදක කොටගත් ඩෙංගු ඇතුළු වසංගත තත්වයන් ගැනත් කාම අපරාධ පිළිබඳවත් විශේෂ අවධානයක් දැක්වීම සුදුසු වේ.

විශේෂයෙන්ම මැයි මස 31 දක්වා කාලය සාගරයේ කැළඹීම්, සුළි කුණාටු, නාවුක අනතුරු ඇතුළු විපත් පෙන්නුම් කරයි.