තුලාව යනු තරාදියයි. තරාදියක් අතින්ගත් පුරුෂයෙකුගේ රූපයකින් තුලා රාශිය නොහොත් තුලා ලග්නය සංකේතවත් කරයි. මේ නිසා තුලා රාශියෙන් සාධාරණත්වය, යුක්තිය, නීතිය හා සමානාත්මතාවය පෙන්නුම් කරයි. තුලා රාශිය පුරුෂ රාශියකි. තුලා රාශියේ අධිපති ග්‍රහයා වන්නේ සිකුරුය. අලංකාරබව, පවිත්‍රබව, ආලය, පී‍්‍රතිය, චිත්‍ර කලාව, නාට්‍ය, සංගීතය වැනි දේ සිකුරුගෙන් නියෝජනය වන බැවින් තුලා ලග්න හිමියෝද සිකුරුගේ බලපෑම අනුව එම දේවල් කෙරෙහි යොමුවේ.

සිකුරු ග්‍රහයා සියලු සම්පත් අධිකව ගෙනදෙන අතර අන්‍යයන් සමඟ විනෝදයෙන් පී‍්‍රතියෙන් කාලය ගත කිරීමේ හැකියාව ලබාදෙන බැවින් තුලා රාශිය සිකුරුට හිමිකර දී ඇත. තුලා ලග්නයෙන් උපන් අය තරාදියක් මෙන් ලොවට සැපදුක් සමසේ බෙදාදෙයි. පුරුෂාකාර මිනිස් රුවකින් තුලා රාශිය හඳුන්වා දී ඇත්තේ මිනිස්කමේ ඇති ශ්‍රේෂ්ඨ උතුම් ගතිලක්ෂණ විදහා දැක්වීමට විය යුතුය. නිතරම සැප කැමති, දැකීමට පි‍්‍රය යහපත් පියකරු ඇස් ඇති නිසා වීනස් දෙව්දුව යනුවෙන් හැඳින්වෙන සිකුරු ග්‍රහයාට තුලා රාශිය ස්වක්ෂේත්‍ර රාශිය ලෙස ඡ්‍යොතිෂයෙහි දක්වා ඇත. තුලා රාශිචක්‍රයේ සත්වැන්නයි. සෙනසුරු උච්ච වන්නේ මේ රාශිය තුළ ගමන් කරන අවස්ථාවලදීය.

පෘථිවියට දුරින්ම පිහිටි රාශිය බැවින් දැඩි දුක් කරදරවලට අධිපති සෙනසුරුගේ බලය මෙහිදී දුර්වලවේ. හීනවේ. එබැවින් දැඩි දුක්කරදරවලින් තොරවූ දීර්ඝායුෂ ලැබීමේ හැකි කමක් තුලා ලග්න හිමියන්ට හිමිවේ. ඔවුහු ස්වශක්තියෙන් දියුණුවීමේ ශක්තියක් ඇත්තෝ වෙති. එමෙන්ම යහපත් විනීත ගති පැවතුම්වලින් යුතු අය වෙති. පුහු අහංකාරයෙන් තොර ආත්ම ගරුත්වය රැකගෙන කටයුතු කරන්නෝ ය. තුලා රාශිය වායෝ රාශියක් නිසා ඇවිදීමට පි‍්‍රයකරන, අලංකාර ලෙස ඇඳුම් පැලඳුම්වලින් සැරසීමටත් ස්වභාව සෞන්දර්ය ආදී දේ නැරඹීමටත් වැඩි කැමැත්තක් දක්වන, කාටත් පි‍්‍රය උපදවන පරිදි ශරීර අලංකාරය පිළිබඳව වඩා සැලකිලිමත් වන අතර අනුන්ට සංග්‍රහ කිරීමට හා චිත්‍ර ශිල්පියට වැඩි දක්ෂකමක් පෙන්වයි. සාධාරණව සිතාබලා නිවැරදිව තීරණ ගැනීමට දක්ෂ වේ. දුටුවන් පි‍්‍රය කරන ශරීරයක් ඇතිවේ. කළගුණ සැලකීම ඉහළින් අගය කරයි. ධාර්මික ගතිවලින් යුක්තය. පියාගෙන්ද අන්‍ය අයගෙන්ද පිදුම් ලබයි. යහපත් දූ දරුවන් ලැබීමේ වාසනාව ඇත. ඉක්මන් කෝපය හා හදිසි තීරණ ගැනීම මොවුන් තුළ ඇති දුර්වලකමක් ලෙස සැලකිය හැකිය. අයුක්තියට හිස නැමීමට ඔවුන් කිසිසේත්ම කැමැති නොවේ. සාමය, සමාදානය අගය කරන ගතිගුණ වගේම උපායශීලී ශූර චණ්ඩියන්ද මේ ලග්නයෙන් උපත ලබා ඇත. තුලා ලග්නය හිමි අයට ගැළපෙන වෘත්තීන් ලෙස දැක්විය හැක්කේ සෞන්දර්යය අංශයට ගැළපෙන නාට්‍ය ලේඛනය. සංගීතය, ඡායාරූප ශිල්පය, සිනමා කර්මාන්තය ආදි යයි. ඊට අමතරව භූමිලාභ ඇති බැවින් මිනිරන්, මැණික් කර්මාන්තය, කෘෂිකර්මාන්තය වැනි දේවලින් ද උසස් තත්ත්වයකට පැමිණිය හැකිවේ. තුලා ලග්න හිමියන්ගේ සෞඛ්‍ය තත්ත්වය ගැන සැලකීමේ දී මොවුහු බොහෝ දුරට නීරෝගි පුද්ගලයෝ වෙති. පහසුවෙන් ලෙඩ රෝගවලට ගොදුරු නොවෙති. නීතියට ගරුකරන ඝෘජු හිතක් තිබෙන ඔවුන් කාට වුවත් කරුණාවන්ත විදියට එමෙන්ම ගෞරවණිය විදියට හිතන්නත් සලකන්නත් උපතින්ම හුරුවී ඇත.

තුලා රාශිය ශනි හෙවත් සෙනසුරු ග්‍රහයාගේ උච්ච රාශියයි. එහෙයින් සෙනසුරු තුලා ලග්න හිමියන්ට උසස් ප්‍රතිඵල ගෙනදේ. තුලා ලග්නයෙන් ජන්ම ලාභය ලැබූ අයගේ ලග්නයේ හෙවත් පළමුකොටුවේ ශනි සිටියේ නම් එම අය ‘සස යෝගයෙන්’ උපන්නෝ වෙති. මෙවැනි අය පරම්පරාගත විශාල ඉඩම් මහා මන්දිර, මිල මුදල්, ධන ධාන්‍යය ලබන්නෝ ය. පිරිවර සේනා ලබන්නෝද, කීර්ති ප්‍රශංසා ලබන්නෝද අන් අයට අනුශාසනා කරන්නෝ ද වෙති. තුලා ලග්න හිමියන්ට කීප ආකාරයකින්ම නීච භංග රාජයෝගද උදාවේ. නීච භංග රාජ යෝගය නම් යම් ග්‍රහයෙකුගේ උච්ච රාශියේම නීචවූ ග්‍රහයන් පිහිටිමය. මේ අයුරින් රවි හා ශනි ලග්නයේ හෝ හත්වැන්නේ යෙදීමෙන්ද, ගුරු ග්‍රහයා හා කුජ ග්‍රහයා හතරවැන්නේ හෝ දහවැන්නේ යෙදීමෙන් ද නීචභංග රාජයෝග උදාවේ. මේ යෝග ඇත්තෝ මිල මුදල්, ධන ධාන්‍ය ලබන අතරම ඉඩකඩම්, යාන වාහන හා යස ඉසුරු එම ග්‍රහයන්ගේ මහදශා, අතුරුදශා ගෙවන කාලවලදී හිමිවේ.

තුලා ලග්නයෙන් උපදින වැඩිදෙනා ව්‍යාපාර ක්ෂේත්‍රයෙහි යෙදෙන අයවේ. නීතිඥවරු, භාෂා පරිවර්තකයන්, නොතාරිස්වරු, පොත්පත් කතුවරු ධනවන්තයන්, කලාකරුවන්, නළුනිළියන්, හා සංගීත ගුරුවරුද මේ ලග්නයෙන් උපත ලබා ඇත. රෝගයන්ට ඔරොත්තු දීමේ ශක්තිය මැනවින් පිහිටා ඇත. තුලා ලග්න හිමියන්ට අසනීප නොසෑදෙනවා ම නොවේ. ඒත් කලාතුරකිනි.

බහුල වශයෙන් තුලා ලග්න හිමියන් පෙළෙන අසනීප තත්ත්වයන් කීපයක් ඇත. මූත්‍රාශය හා ඒ ආශි‍්‍රත අසනීප ප්‍රධාන වේ. නිසි පරිදි මූත්‍රා නොපෙරීම, මූත්‍රාවල, ආම්ලික තාවය, තුනටියේ වාත රෝග, බහු මූත්‍රතාව ආදිය ද වේ. තුලා ලග්න හිමියන්ගේ කේන්ද්‍රවල 2, 8, 12 යන ස්ථානවල එකක ශනි පිහිටීම අසුබය. තුලා ලග්න හිමි කාන්තා කේන්ද්‍රවල පස්වැන්නේ රාහු පිහිටීමද සුබ නොවේ. තුලා ලග්න හිමියන්ගේ කේන්ද්‍රවල 6 වැන්නේ රාහුද, 7 වැන්නේ කේතුද, 3 වැන්නේ ගුරුද පිහිටීම මාරක යෝගයක් වේ. මෙවැනි පිහිටීම් ඇති අය මෝටර් රථවාහනවලින් ප්‍රවේශම් විය යුතුය. ගමන් බිමන් හේතුවෙන් සිවුපාවන්ගෙන්, ආදරය ඇති අයගෙන් වෙන්වීමෙන් ඇතිවෙන ශෝකයෙන්, නිරාහාරව ඉදීමෙන්, මූත්‍රාශය පිළිබඳ රෝගයකින් දියවැඩියාව වැනි රෝගයකින් මරණ සිදු වීමට බොහෝ දුරට ඉඩ ඇත.