මේෂ, සිංහ, කන්‍යා, මකර ලග්න හිමියන්ට මහත් සුබපල උදා කරමින් ද අනෙක් ලග්න හිමියන්ට විවිධ සුබපල ලබා දෙමින් ද මේ මස 21 වැනිදා අඟහරුවාදා උදේ 10.04ට ග්‍රහ ලොව පෙරැළිකරු වන අඟහරු ග්‍රහයා වක්‍ර ගමනින් බුධට අයත්වන මිථුන රාශියට ප්‍රවිෂ්ට වී උච්ච ග්‍රහයකු මෙන් බලවත් වෙයි.

අඟහරු ශුභ ඵල දෙන ලග්න හිමියන්ට මේ කාලයේදී රැකියා හා ව්‍යාපාර කටයුතු සාර්ථක වීම, සතුරු ප්‍රශ්න, නඩුහබවලින් ජය ලැබීම වැනි සුබපල ඇති කරන්නේය.

වෘෂභ, මිථුන, කටක, තුලා, වෘශ්චික ධනු , කුම්භ යන ලග්න හිමියන් කුජ මාරුවෙන් සුබ පල ලැබීමට අඟහරුවාදා, සෙනසුරාදා දිනවල ආගමානුකූලව පින්දහම් කරමින් කාලය ගත කළ යුතුය. එමඟින් අනාගත ආයෝජන හා අධ්‍යාපන කටයුතු අසාර්ථකවීම, හදිසි අනතුරු, ශෛල්‍යකර්මයන්ට ලක්වීම, වැඩිහිටියන්ට සමීපව කටයුතු කරන්නන්ගේ ගැටලු, පවුල් ජීවිතවල ගැටුම්, රැකියා ව්‍යාපාරවලින් පාඩු, සතුරු කරදර වැනි විපාකවලින් මිදීමට හැකි වනු ඇත.

අඟහරු ග්‍රහයාගෙන් සුබපල ලැබීමට අඟහරුවාදා දින ලා රතු වස්ත්‍රයකින් සැරසී කතරගම දෙවියන්ට පහනක් තබා අඟහරු ග්‍රහයා අයත් හෝරාවේ අඟහරුගේ පංචම කාල හෝරාව තුළ පවතින මිනිත්තු 4ක් පමණ වන අඟහරුගේ සූක්ෂ්ම කාල හෝරාවෙන් දකුණ බලා සුබ වැඩ කටයුතුවල යෙදීමෙන් ඉෂ්ට සිද්ධිය ඇති වන්නේය.