අංක විද්‍යාව සම්බන්ධයෙන් උනන්දුවක් දක්වන බොහෝ අය තම දෛව අංකය පිළිබඳ වැඩි අවධානයක් යොමු කරනු දක්නට ලැබේ. සමාජයේ බොහෝ දෙනෙක් වාසනා අංකය නමින් ද මෙය හඳුන්වයි. පුද්ගලයෙකුගේ ජීවිතය හා සම්බන්ධ වැදගත් කාරණා සම්බන්ධයෙන් දෛව අංකය සුවිශේෂී තැනක් හිමිකර ගනියි. තමන්ගේ උපන්දිනය දන්නා ඕනෑම කෙනෙක්ට දෛව අංකය පහසුවෙන් සොයාගත හැකිය.

එය සොයාගනු ලබන්නේ උපන් අවුරුද්ද, මාසය, දිනය තනි අංකයක් වන ලෙස එකට එකතු කිරීමෙනි. මෙම උදාහරණයේ ආකාරයට ඔබටත් ඔබගේ දෛව අංකය පහසුවෙන්ම සොයාගත හැකිය.

උදා - 1985.03.13

1+9+8+5+3+1+3 = 30

3+0 = 3

මේ අනුව මොහුගේ දෛව අංකය 3 ලෙස ලැබී ඇත. ඔබගේ උපන් දිනයට අනුවද මේ ආකාරයෙන් දෛව අංකය සොයා ගන්න.

ඔබ ජන්මය ලැබුවේ දෛව අංක 03 න් නම් ඔබ ගුරු හෙවත් බ්‍රහස්පති ග්‍රහයා ගේ ශක්තීන් වැඩි වශයෙන් ආකර්ෂණය කරගනිමින් උපන් අයෙකි. ඔබට ඉතාමත් සංවේදී හිතක් ඇත. එමෙන්ම නිර්මාණාත්මක මෙන්ම දාර්ශනික අදහස්වලින් යුක්ත අයෙකි. ආත්ම ප්‍රකාශනයට ළැදි ඔබ තරමක් හැඟීම්බර පුද්ගලයකු ද වෙයි.

සාහිත්‍යය, කලාව මෙන්ම සෞන්දර්ය අංශයට ඔබට උපන් හැකියාවක් දක්ෂතාවයක් ඇත. ඉගෙන ගැනීමට මෙන්ම ඉගැන්වීමටත් ඒ වගේම උපදේශනයටත් හොඳ සහජ හැකියාවක් තිබේ. කුඩා කාලයේ සිටම ඔබ ලේඛන කලාවට සාහිත්‍යයට සංගීතයට ඇලුම් කරන ස්වභාවයෙන් යුක්ත වෙයි. එමෙන්ම ඔබට අන් අයට උපදෙස් දීමේ සහජ හැකියාවක් ද ඇත. අසාධාරණයට විරුද්ධ ඔබ නීතිය සහ සාධාරණත්වය හැමවිටම අගය කරයි. හොඳ ආත්ම විශ්වාසයකින් යුක්ත ඔබ අභියෝග ජය ගැනීමට දක්ෂ වෙයි. මොන තරම් කරදර බාධක ආවත් ඒ සියල්ල අබිබවා ඉදිරියට යෑමේ ශක්තිය ඔබට ඇත. තම රැකියාව සහ රාජකාරි කටයුතු නොපිරිහෙලා අකුරටම ඉටු කිරීමට ඔබ උත්සාහ ගනී.

ආර්ථිකමය වශයෙන් ශක්තිමත් වීමේ හැකියාවක් ඔබට ඇත. එහෙත් ඒ සඳහා යම් කාලයක් ගත වනු ඇත. ඔබේ දියුණුව තරමක් හෙමින් සිදුවෙයි. එහෙත් හෙමින් යන ගමන සාර්ථක බව මතක තබාගන්න. ජීවිතයේ මැදි වයස සිට ආර්ථිකය ශක්තිමත් වීමට පටන් ගන්නා අතර පසු කාලය තුළ හොඳ ස්ථාවරත්වයක් ගොඩනගා ගනී. මොන තරම් කාර්යබහුල ජීවිතයක් ගත කළත් ඔබ ඔබගේ සෞඛ්‍යය පිළිබඳව ද අවධානය යොමු කිරීමට මතක තබාගන්න.

මොවුන් නිතරම සතුටින් සිටීමට උත්සාහ කරයි. මොන තරම් කරදර බාධක ප්‍රශ්න තිබුණත් ඒ කිසිවක් ගැන ඕනෑවට වඩා හිතන්නේ නැත. සතුට සහ විනෝදය වෙනුවෙන් වියදම් කිරීමටද ඉදිරිපත් වෙයි. ශක්තිමත් සිතුවිලි ඇති මොවුන් ආත්ම විශ්වාසයෙන් කටයුතු කිරීම තුළ දියුණුවක් ඇතිකර ගනී. මුදල් පරිහරණයේදී ඔබ වඩාත් සැලකිලිමත් විය යුතුය. නිසි සැලැස්මකින් තොරව මුදල් වියදම් කිරීම හා පරිහරණය කිරීම තුළ අපහසුතාවයන්ට ලක්වීමේ අවදානම පවතී.

ඔබ තුළ සහජ හැකියාවන් සහ දක්ෂතාවයන් විශාල වශයෙන් සැඟවී තිබිය හැකිය. ඒ දේවල් උත්සාහයෙන් මතුකර ගැනීම තුළ රටට සමාජයට ලෝකයට විශාල බලපෑමක් වෙනසක් කිරීමේ ශක්තිය හැකියාව ඔබට පවතී. අන්‍යයන්ගේ මනසට බලපෑම් කළ හැකි විශේෂ දක්ෂතාවයක් ඔබට ඇත. සමාජය තුළ විශාල පිරිසක් අතරින් ඉහළට මතුවිය හැකි කැපී පෙනෙන චරිතයක් ලෙස ඔබව හඳුන්වා දිය හැකිය. අවසානයේ ඔබගේ ජීවිතයේ බොහෝ ඉලක්ක ජයග්‍රහණය කිරීමට ඔබ සමත් වෙනවා ඇත. කෙසේ හෝ සතුටින් ජීවිතය ගෙවීමේ වාසනාව දෛව අංක තුනෙන් උපන් ඔබට පවතී.

(දෛව අංක 4 හිමි ඔබගේ පලාපල ලබන කලාපයෙන් බලාපොරොත්තු වන්න.)