ඇතුපිට විෂ්ණු දෙවියෝ වැඩ උන් සින්දා
පොතුපිට ගසින් ගලවා ගත මුල සින්දා
වතුරට යොදා අට එකකට ගෙන සින්දා
මතුවට එදා කොයිවා එන උණ සින්දා

ඇත්දෙමට පොතු හා විෂ්ණුකාන්ති ගෙන වතුර කෝප්ප අට එකට සිඳ කසාය දෙන විට වාත ප්‍රධානව එන නැවත නැවත හටගන්නා උණ රෝගය සම්පූර්ණයෙන්ම නැතිවී යන බව එහි අදහසයි.

අගලේ පස් කොටා යතුරින් තම්බාලා
තුඹස් පස් කොටා දිය එක්කර ගල්ලා
ඇය නොපතන දේත් කුඩුකර දීපල්ලා
අඟල කපනු අප්පුට ගුටි ඇනපල්ලා

ආඩතෝඩ පස්පංගුව ගෙන කොටා වණ්ඩුවේ තම්බා පෙරාගත් වතුරට මී පැණි හා තිප්පිලි කුඩු දමා බීමෙන් කැස්ස සුව වේ.

වතුර මිති මාමේ ඔසු දනිත හිඳ
වතුරදර රුදුරු පුල් බුනිඹ පැපලි ළිඳ
වතුර අටනෙකට සිඳ දුන බර කරඳ
වතුර අලපතේ මෙන් උණ බැසවි සොඳ

දියමිත්ත, සඳුන්, කලාදුරු, ඉඟුරු, සැවැන්දරා, කොත්තමල්ලි, රසකිඳ, ඉරිවේරියා, කටුවැල්බටු, මහනෙල්, බිංකොහොඹ, පත්පාඩගම්, කලං එක බැගින් ගෙන වතුර පත අට එකකට හිඳ දුන් විට නෙළුම් පත්‍රයක දැමි දිය මෙන් උණ බැස යන බව මින් අදහස් වේ.

වෛද්‍ය නිරූපා සංජීවනී රත්නායක මහත්මියගේ රහස් බෙහෙත් කවි කෘතියෙනි.