මම ශ්‍රී ලංකා දුම්රිය දෙපාර්තමේන්තුවේ විධායක නිලධාරියකු වන ප්‍රවාහන අධිකාරි තනතුර හොබවන කාලයේ ඉන්දියාවේ චෙන්නායි නගරයේ පිහිටි (Southern Indian Railways)  දකුණු ඉන්දියානු දුම්රිය සේවයේ දුම්රිය පුහුණු පාසලක නේවාසිකව පුහුණුව ලදිමි.

එකල එම දුම්රිය පාසලේ විදුහල්පති එස්. නඩේසන් මහතා සමඟ තෛයිපොංගල් උත්සව දිනයක වියතීස්වරන් මහ කෝවිලේ සුවිශේෂ වූ මහා පූජාවකට අප හැඳ පැලඳ ආ සියලු ඇඳුම් උනා තබා කෝවිල් කාර්යාලයෙන් ලබා දුන් සුදු වේට්ටියක් හැද උඩුකය නිරාවරණයෙන් යුතුව ඊට සහභාගි වුණෙමු. ඉන් අනතුරුව අපි කෝවිලට නුදුරින් පිහිටි මලයාලම් භාෂාවෙන් නාඩි වාක්‍ය කියන ස්ථානයකට ද පිවිසීමු. එම ස්ථානය පවත්වාගෙන ගියේ දුම්රිය පුහුණුූ පාසලේ විදුහල්පති නඩේසන් මහතාගේ හොඳ ගෝලයකු වන බාලක්‍රිෂ්ණන් නම් පූසාරිවරයාය.

අහම්බෙන් මේ ලැබුණූ අවස්ථාවෙන් ප්‍රයෝජනය ගෙන ද නාඩි වාක්‍ය ශාස්ත්‍රයක් ඇසීමට සිතුවෙමි. ඊට වහාම අවකාශය සලස්වා දීමට නඩේසන් විදුහල්පතිතුමා කාරුණික විය. එතුමාගේ මඟ පෙන්වීම ඔස්සේ එකල නියමිත ගාස්තුව වූ ඉන්දියන් රුපියල් දහයක් පඬුරක් ලෙස තබා එම කුඩා කාර්යාලයට අපි දෙදෙනා පිවිසීමු. මුලින්ම මාගේ උපන්දිනය අසා දකුණුූ අත මහපට ඇඟිල්ලේ සලකුණු දා ගෙන එම කාර්යාලයේ තවත් කුටියකට ගිය එම පූසාරිවරයා නොබෝ වේලාවකට පසුව දිගු තල්පත් පුස්කොළ පොත් මිටියක් ද රැගෙන පැමිණියේය. ඔහු මලයාලම් භාෂාවෙන් කියන දෙය මා හට පරිවර්තනය කර සහය වූයේ විදුහල්පතිතුමාම ය. එතුමා විවිධ භාෂා රැසක්ම දන්නා ප්‍රවීණයකු වූ බැවිනි. ඔහු නම් පහක් ගෙන හැර පාමින් ඉන් මගේ පියා කවුරුන්දැයි විමසීය. මාගේ පියාගේ නම මත පීරිස් නාමය ද එහි තිබී මම හඳුනා ගනිමි. ඉන්පසු තවත් නම් පහක් දක්වමින් මින් මාගේ වත්මන් මව කවුරුන්දැයි විමසීය. එහි මාගේ මවගේ නිවෙසට භාවිතා කරන ලීලා යන නම තිබී හඳුනා ගනිමි. ඉන් අනතුරුව නැවත පෙර කුටියට ගොස් සුළු වේලාවකින් පැමිණි බාලක්‍රිෂ්ණන් මහතා මාගේ නම විජය දැයි ඇසුවේය. මා එසේ යයි කී කල මා මවිත කරමින් මාගේ සියලුම සහෝදර සහෝදරයින්ගේ නම් නිවැරදිව ප්‍රකාශ කළේය.

එපමණක් නොව නැවත නම් පහක් ඉදිරිපත් කරමින් වත්මන් බිරිඳගේ නම කුමක්දැයි විමසුවේය. පුදුමයක මහත විවාහයට පෙර මා ඉතා කුලුපගව ඇසුරු කළ ගැහැනු ළමයින් හතර දෙනකු ගේ ද නම් සමඟ බිරිඳගේ නම ද එහි සඳහන් වී තිබුණි. මාගේ බිරිඳගේ නම මා ප්‍රකාශ කළ වහාම මා එකම දියණිය ගේ නම නිවැරදිව කීමට එතුමා සමත්විය. පවුලේ සියලු විස්තරත් අතීත සිද්ධින් රැසකුත් නිවැරදිව කීමට ඒ පූසාරි තුමාට හැකිවිය.

ඉන් අනතුරුව විදුහල්පතිතුමා මලයාලම් භාෂාවෙන් මා ශ්‍රී ලංකා දුම්රිය දෙපාර්තමේන්තුවේ නිලධාරියකු බවත් දැනට දුම්රිය පුහුණු පාසලේ පුහුණුව ලබන බවත් ප්‍රකාශ කළේය.

එයට සවන් දුන් නාඩි වාක්‍ය පැවසූ පූසාරිතුමා කීවේ අනාගතයේදී මා දෙපාර්තමේන්තු ප්‍රධානියකු වන බවත්, දුම්රිය දෙපාර්තමේන්තුවේ සහ පිටත ප්‍රචලිත පුද්ගලයකු වන බවත්, ඉහළටම ඉගෙන ගෙන කවදා හෝ සම්මානිත මහාචාර්යවරයකු වන බවත් පැවසීය. ඒ අවස්ථාවේ පී‍්‍රතියෙන් උද්දාමයට පත් විදුහල්පතිතුමා මාගේ සුරතින් අල්ලාගෙන සුබපැතුම් පළ කළේය.

එවිට නම් මා වඩාත් මවිතයට පත් වුණේ තුන්හිතකවත් නොතිබුණු ආචාර්ය උපාධියක් (ර්‍ථඩ.ච්) ගැනත් දෙපාර්තමේන්තු ප්‍රධානියකු වන බවත් අනාවැකි පළකළ නිසාවෙනි. එදා මුලින්ම මාගේ සිතේ මෙතුමා රෝපණය කළ මෙම කළල බීජය සරුවට වැඩෙන්නට ඉඩ හැරුණි. ඉන් ලත් ප්‍රතිඵලයක් නිසාදෝ, පසුකාලීනව මා ශ්‍රී ලංකා දුම්රිය දෙපාර්තමේන්තුවේ මාධ්‍ය ප්‍රකාශක බවට පත්විණි. දෙපාර්තමේන්තු ප්‍රධානියකු බවට ද පත්විණි. ආචාර්ය උපාධිය ද සේවා කාලය තුළම ලබා ගත්තෙමි.

ඉදින් නඩේසන් මහතාත්, නාඩි වාක්‍ය කියන බාල ක්‍රිෂ්ණන් මහතා ද සුහර්දයන් වන නිසාවෙන් ඕනෑම අමතර ප්‍රශ්නයක් විමසීමට ද මා හට අවකාශ ලැබුණි.

ඉන් උපරිම ප්‍රයෝජනය ගත් මම මේ පැරණි තල්පත් පුස්කොළ පොත් ඔබට ලැබුණේ කෙසේ ද යන්නත්. එහි සඳහන් සංකේතය සහ භාෂාව හඳුනාගෙන නාඩි කියවා ශාස්ත්‍රය ප්‍රගුණ කළේ කෙසේදැයි මම විමසුවෙමි.

එයට ඉතා නිහතමානීව සංයමයෙන් යුතුව එතුමා පිළිතුරු දුන්නාය. ඔහුගේ පියා සහ පියාගේ පියා ද (මුත්තා) මෙම නාඩි වාක්‍ය කියවීමට සමත් බවත්, තම මුත්තණුවන්ට මේ පුස්කොළ පොත් ලැබුණේ උතුරු ඉන්දියාවේ හිමාල ප්‍රදේශයේ ඍෂිනගර්හි සිටි ඍෂිවරයකු බඳු ගාන්ධර්වයකුට ආවතේවකම් කළ නිසාවෙන් බවත් එතුමා පැවසීය. එම පඬිතුමාගේ ආයුෂ අවසන් කාලයේදී මිය පරලොව යාමට මත්තෙන් තම මුත්තණුවන් පුරා වසර විසිපහක කාලයක් එතුමාට ලබා දුන් සහාය මෙහෙවරට ප්‍රදානයක් ලෙස මෙම වටිනා පුස්කොළපත් සමූහය ලබාදී ඇති බවත්, ඒවා පරිශීලනය කරන සංකේත ආදි ක්‍රමවේදය තම මුත්තණුවන්ගෙන් තම පියාට ද තම පියාගෙන් තමාටත් දායාද වූ බව පැවසීය. මේ වන විට ඉන් නොනැවතී තම පරම්පරාවට මේ ශාස්ත්‍රය ලබාදීමේ අභිප්‍රායෙන් තම පුතාට ද නාඩි කියවීමේ හැකියාව ප්‍රගුණ කරවන බව ද ඉතා නිහතමානීව පැවසීය.

පෙරදිග ශාස්ත්‍රවලින් එකක් ලෙස ගැනෙන නාඩි වාක්‍ය විවිධ දර්ශනවාදයේ උල්පතක් බදු මහා භාරතයේ උපත ලද්දකි. ගංගා, සින්දු වැනි මහා ගංගාවලින් පෝෂිත හිමාල අඩවියේ දේවධාර වනාන්තරවල සඳුන් රුක් සෙවණේ ඍෂිවරු මුළු මහත් මිනිස් වර්ගයේ හිත සුව පිණිස අධ්‍යාත්මික විමුක්තියේ නිරත විය. එමෙන්ම විවිධ ජීවන මාර්ගවල නිරත සංකීර්ණ වූ මිනිස් දිවිගමන, පවිත්‍ර වූත්, නිරාමිස වූත්, දුක් වේදනාවෙන් නොවූත් ජීවන පරිචයක් ගොඩනඟන්නට තම මුළු මහත් දිවි පෙවෙතම අධ්‍යාත්මික සුවය සඳහා කැප කරන්නට විය.

දියුණු මනසකින් සපිරුණු මේ ඍෂිවරුන් ලොව පුරා මිනිසුන්ගේ ජීවන තතුවලින් සමන්විත අති මහත්වූ මේ සංසාර ගමන තම මනසින් දුටුවහ.

එක් එක් මිනිසුන් තුළ පවතින ගති පැවතුම් හා ඔවුන්ගේ භවගමන ඍෂිවරුන්ගේ මනසට ග්‍රහණය විය. මිනිසා තමන් විසින්ම කරගන්නා විවිධ වු ක්‍රියාදාමයක් නිසා මේ භව ගමනේදි ඔවුන් හට නොයෙකුත් විපත් දුක්කම්කටොලු ඇතිවන බව ප්‍රකාශ කළේය.

යමෙක් කරන යහපත් ක්‍රියා අනුව හොඳ ප්‍රතිඵල ලැබෙන බව ද ඔවුහු පැවසූහ. මිනිසාගේම ප්‍රයෝජනය පිණිස මේ ජීවන ගමනේ තොරතුරු ඍෂි භාවිතය මත පසුකාලීනව තල්පත්වල සටහන් කෙරුණේ මහා ප්‍රතිහාර්යක් මෙනි.

නූතන තාක්ෂණයෙන් හිනිමං පෙත කරා ගිය ග්‍රහ තාරකා පවා ජයගන්නා වත්මන් පරිගණක යුගයේ තවමත් හෙළිපෙහෙළි නොවුණු දේවල් පිළිබඳ ඍෂිවරුන්ට මනා අවබෝධයක් තිබුණේ මෙයට වසර දහස් ගණනකට පෙර සිටය.

සූර්යයාගේ චන්ද්‍රයාගේ මෙන්ම වෙනත් ග්‍රහ තාරකා ස්වභාවය එහි ගුණාත්මක භාවයන් එහි ගෝචර ගමනත් නිසි ලෙස අවබෝධ කර ගත් ඍෂිවරු ඒ තුළින් ඡ්‍යොතිෂය ලොවට දායාද කළහ. එමෙන්ම අප වටා පරිසරයේ හෙබි වෘක්ෂලතාවල විවිධ වූ ගුණයන් තුළින් ආයුර්වේදය ලොවට හෙළි කළහ. වේදය, උපනිෂද් හා වේදාන්තය ද ඍෂිවරු අතින් ලොවට බිහිවිය.

ග්‍රහ තාරකා මත බිහිවුණූ ඡ්‍යොතිෂය මෙන්ම මිනිසාගේ සංසාර ගමන පෙර හා මතු භවයන් පිළිබඳ තොරතුරු මිනිසාගේම ප්‍රයෝජනය සඳහා නාඩි වාක්‍ය ලෙස ප්‍රකාශ විය.

මෙයට වසර 5000 පමණ පෙර ධ්‍යානලාභී අනුන්ගේ සිත් කියවිය හැකි ලෝකයේ මහත් වූ බල සම්පන්න වූ ඍෂි මණ්ඩලයක් විසින් ශ්ලෝකවලින් තම ගෝලයන්ට ඉගැන්වීම සිදුකරන ලදී. මූලිකව නාඩි වාක්‍ය තල්පත් මත එදා ඉන්දියාවේ විසූ මහා පුරුෂ ලක්ෂණ ඇති අයගේත් 30,000 දෙනාගේ චරිත එහි රචනා වී තිබුණි. පසුකාලීනව සමස්ත මානව වර්ගයාගේම මුළු මහත් ලොවෙහිම වසන සෑම ජන්මලාභී මිනිසකුගේම චරිත පිළිබඳ විස්තර රචනා වී තිබීම අති මහත් කටයුත්තක් විය.

නාඩි වාක්‍ය ලියවී ඇත්තේ එදා ඉන්දියාවේ ව්‍යවහාර කළ භාෂාවන්ගෙනි. වෛදික, සංස්කෘත සහ ප්‍රාකෘත භාෂාවලින් ශ්ලෝක ලෙසින් ලියවී තිබුණි.

එදා දකුණු ඉන්දියාව පාලනය කළ නාඩි වාක්‍යවල වටිනාකම මැනවින් වටහාගත් තන්ජෝර් මහ රජතුමාගේ කාලයේදී එකල ඉන්දියාවේ විසූ සියලු පඬිවරුන් ගෙන්වාගෙන සජ්ඣායනා කොට එම ශ්ලෝක සියල්ලම ග්‍රන්ථාරූඪ කෙරිණ. එයින් සමහර ඒවා ඉන්දියන් භාෂාව හා කර්ණාටක, තෙලිඟු, දෙමළ යන භාෂා ගණනාවකට පරිවර්තනය කොට ඒවා තල්පත්වල ලියනු ලැබීය.

එකල නාඩි ශාස්ත්‍රයේ ස්වර්ණමය යුගය වුවද පසුකාලීනව එම තන්ජෝර් පෙළ පතින් ආ බටහිර අධ්‍යාපනය ලද එක් රාජ පුත්‍රයකු මෙම නාඩි ක්‍රම වේදයට විරුද්ධව නැඟී සිටියේය. එම රාජ පුත්‍රයා රාජාභිෂේක වීමෙන් අනතුරුව නාඩි වාක්‍ය ශාස්ත්‍රයට විරුද්ධව කටයුතු කරන්නට විය. පසුකාලීනව එම රජුගේ නියෝග පරිදි සංරක්ෂිතව පැවැති එම පුස්කොළපත් විශාල ප්‍රමාණයක් කිඹුලන් බහුලව සිටින දිය අගලකට විසි කිරීමට ඔහු නියෝග කළේය. ඒත් මේ වටිනා ශාස්ත්‍රය අගය දන්නා අය ඒවා මහත් පරිශ්‍රමයක් ගොඩගෙන රහසිගතව ඒවා සඟවා සංරක්ෂන කරනු ලැබූහ. එහෙත් කොටසක් එහිදී විනාශයට ද පත්විය.

මේ තල්පත්වල කොටසක් ඉංගී‍්‍රසි ආධිපත්‍යය ඉන්දියාව නතු වූ අවධියේ එංගලන්තයේ ලන්ඩන් නුවර පුස්තකාලයට රැගෙන ගොස් තවමත් ඒවා ලන්ඩන් පුස්තකාලයේ ගබඩාවල පවතින බව ද කියැවෙයි.

නාඩි වාක්‍ය සම්බන්ධයෙන් ලංකාවේ උගතුන් රැසක් විවිධ අදහස දක්වා තිබේ. ඉන් ප්‍රධානත්වයන් ගන්නේ අභිධජ මහරට්ඨගුරු අග්ගමහා පණ්ඩිත අතිපූජ්‍ය බළංගොඩ ආනන්ද මෛත්‍රය මහනාහිමියන්ගේ ප්‍රකාශයයි.

උන්වහන්සේ ප්‍රකාශ කර ඇත්තේ මෙයට වසර 5000කට පෙර ඉන්දියාවේ සිටි ඍෂිවරු අවුරුදු 5000 අතීතයක් එදා වර්තමානයත්, අවුරුදු 5000 අනාගතයක් දැකීමේ ඥානයකින් පිරිපුන්ව සිටි බවයි. ලෞකික භාවනා සහ ධ්‍යාන භාවනා දියුණු කර මනස ඉතා දියුණු කර ගත් එතුමන්ලා ධ්‍යාන බලය උපයෝගී කරගෙන විශ්වයේ පවතින විවිධ විද්‍යාවන් ගවේෂණය කර ඒවා සටහන් කරගෙන ඡ්‍යොතිෂ විද්‍යාව මහා පුරුෂ ලක්ෂණ විද්‍යාව, ආයුර්වේද වෛද්‍ය විද්‍යාව , යන්ත්‍ර සූත්‍ර නිපදවීම, ආයුධ නිපදවීම , තාක්ෂණ ක්‍රම විද්‍යාවන් ලොව ප්‍රකට පොත්පත් වර්ග, පෘථිවියේ කලින් ඉපදුණ සහ ඉදිරියට උපදින්න සිටින මනුෂ්‍යයන්ගේ ජීවිත ගැන තවත් බොහෝමයක් මාතෘකා රැසක් යටතේ විශ්වයෙන් තොරතුරු ලබාගෙන ඒවා වාචිකව මුඛ පරම්පරාවෙන් පරම්පරාවටත් පසුකාලීනව ග්‍රන්ථාරූඪව පැවැතීමටත් සැලැස්වූ බවය.

නාඩි වාක්‍යය විවිධ අංශ රැසකින් සමන්විතය. ඡ්‍යොතිෂ විද්‍යාව, පුුරුෂ ලක්ෂණ විද්‍යාව, වෛද්‍ය විද්‍යාව, යෝග ශාස්ත්‍රය හස්ත රේඛා ශාස්ත්‍රය, තාරකා විද්‍යාව, යන්ත්‍ර සූත්‍ර /ආයුධ නිෂ්පාදනය ලොව පහළ වන ශාස්තෘවරුන්, ලොව ප්‍රකට වන පොත්පත් ලොව පතළ වන ප්‍රධාන ආගම්, ලොව පහළවන මනුෂ්‍යයින්ගේ ජීවිත යන අංශයන්ගෙනි.

නාඩි වාක්‍ය ලියා ඇත්තේ මහා පුරුෂ ලක්ෂණවලින් අඩුතරමින් එකක්වත් තියෙන අය ගැන පමණක් බව විශ්වාසයයි. නාඩි වාක්‍යයක් යමකුට කියවෙනවා යනු ඔහු හෝ ඇය විශේෂ පුද්ගලයකු බවය. නාඩි වාක්‍ය ඉතිහාසය සොයා බැලීමේදී දක්නට ලැබෙනුයේ තල්පත්වල මුලදී ඒවා ලියා ඇත්තේ කුඩා ඉරිකැබලි උපයෝගී කරගෙන සංඛේත භාවිත කොටගෙන බවය.

මහාචාර්ය ආනන්ද මෛත්‍රය නායක හිමි බෝධිසත්වයකු බවත් මතු බුදුවන බවත් නාඩි වාක්‍ය මඟින් ඉන්දියාවේදී ප්‍රකාශ කර ඇත.

ආනන්ද මෛත්‍රය මහනාහිමියන් බුදුන්වහන්සේ ගැනත්, ජේසුස් වහන්සේ ගැනත් නාඩි වාක්‍ය තුළින් ඉන්දියාවේදී බලා තිබිණි. එහි දී ගෞතම බුදුන් වහනසේ ලංකාවට තුන්වරක් වැඩම කරන පුවතක්, බුදුන්වහන්සේගේ වයස් ආයුෂ ප්‍රමාණය අවුරුදු 80 මාස 10 දින 15 ආයුෂ භුක්තිවිඳ ඇති බවත් පෙනෙයි.

ජේසුස් වහන්සේ පිළිබඳ නාඩි වාක්‍ය මඟින් විමසීමේදී දැනගත හැකිව තිබෙන්නේ,

තරුණ ජේසුස් වහන්සේ තවලමකට එකතුවී ඉන්දියාවට ගිහින් ඇති බවත්, එහිදී හමුවූ ටිබෙට් ජාතික භික්ෂූන් වහන්සේ නමක් යටතේ ගෝල හිමිනමක ලෙස බෞද්ධ දර්ශනය, විවිධ සුවකිරීම් ක්‍රම, ප්‍රතිකාර ක්‍රම, මැවීම් ක්‍රම යෝග ක්‍රම හදාරා ඇති බවය. පසුව උන්වහන්සේගේ අවසාන කාලයේ තමා කුරුසයක තබා ඇන ගසන බව කලින් දැන සිටි බව ද දැනගන්නට ලැබේ. පසුව ජේසුතුමා පලස්තීනය අතහැර දමා ගියේය. ජේසුස් යන නම ලෝකයේ මිනිසුන්ට අමතක නොවන බවත් එහි සඳහන් වී ඇත.

ලොවෙහි ප්‍රචලිත නාඩි වාක්‍ය ක්‍රම මොනවාදැයි බැලීමේදී

අගස්ති කෞශික නාඩිවාක්‍ය ක්‍රමය (ශ්‍රී ලංකාවේ මෙය භාවිත කරයි)

කමලමුණි නාඩි වාක්‍ය ක්‍රමය

කාක බ්‍රජන්දර නාඩිවාක්‍ය ක්‍රමය

සප්ත ඍෂි නාඩි වාක්‍ය ක්‍රමය

සූර්ය නාඩි වාක්‍ය ක්‍රමය

කෞමාර නාඩි වාක්‍ය ක්‍රමය

මෙයටත් අමතරව වෙනත් නාඩි වාක්‍ය ක්‍රම ද ඉන්දියාවේ ප්‍රචලිතව ඇත.

ඉන්දීය නාඩි වාක්‍ය කියන්නන්ගේ විවිධ ගුරු කුලද ඇත. සමහර ගුරු කුල තම ශිෂ්‍ය පරම්පරාවෙන් පිටතට මේ නාඩිවාක්‍ය කියවීමේ හැකියාවන් ප්‍රගුණ කිරීම නොකරන අතර ඇතැම් කොටස් ගුරුමුෂ්ටි ලෙස රඳවාගෙන සිටියි.

කාලතරණය කිරීම හා අනාවැකි ඉතා නිවැරැදිව කිව හැකි ශාස්ත්‍රමය ඥානයන් පෙරභවය සහ ඉදිරි භව ගමන ගැන අනාවැකි කීමත් බොහෝ විට ගුරුමුෂ්ටි ලෙස රඳවා ගනියි.

මහා ඡ්‍යොතිෂ්‍ය – කුලකයේ උපකුලකයක් ලෙස නාඩිවාක්‍ය ශාස්ත්‍රය පවතියි. මෙහි පුදුම සහගත තත්ත්වය නම් ලෝකයේ සිටින බිලියන 8ක් පමණ මිනිසුන්ගේ තොරතුරු විශ්වයෙන් ලබාගෙන තල්පත්වල පසුකාලීනව සඳහන් කොට තිබීමයි. හෙට උපදින අනාගත දරුවන්ගේ ජීවන තොරතුරු අඩංගු පුස්කොළ පොත් මහත් සමුදායක් භාරතය සතුව පවතී. ආත්මීය භාෂාවන්ගේ පුනර්ජීවනයක් මෙම නාඩිවාක්‍ය තුළින් දැකිය හැකිය.

ඉදිරි අනාවැකි නිවැරැදිව කීමට ඇති හැකියාව නිසා මිනිසාගේ ඉදිරිගමන දිරිමත් කිරීමට මනසින් එයට පෙලඹීමට උත්සාහ දැරීම තුළින් මුළුමහත් ලෝකයම දිනිය හැකිය.

මෙම අරුම පුදුම විස්මිත අනාවැකි කිවිය හැකි නාඩිවාක්‍ය ගැන වුවද අවසන්ව කිව හැකි වන්නේ බුදු වදනකිනි.

කාලමයෙනි

කිසියම් දෙයක් ඔබේ ශාස්තෘවරයා කී පමණින් ද ඔබේ පරම්පරාවෙන් පැවත එන නිසා ද දෙමාපියන්,ගුරුවරුන් වැඩිහිටියන් කී නිසාද පතපොතෙහි ඇති නිසා ද පිළි නොගන්න.

එය ඔබ විසින් ඔබේ ප්‍රඥාව තුළින් විමසා බලා සුදුසු යයි හැඟේ නම් පමණක් පිළිගන්න.

(කාලාම සූත්‍රය - ගෞතම බුදුන් වහන්සේ)

හිටපු දුම්රිය සාමාන්‍යාධිකාරි (මෙහෙයුම්)

ඡ්‍යොතිෂ /වාස්තු පර්යේෂක

ඡ්‍යොතිෂ ඩිප්ලෝමා /ඡ්‍යොතිෂ උසස් ඩිප්ලෝමාධාරි

ඉන්දීය චන්දිගාර් විශ්වවිද්‍යාලය

අනුබද්ධ ශිරෝමනී උපාධි විද්‍යාර්ථි

ආචාර්ය විජය සමරසිංහ