ආයුර්වේදයට අනුව මෙය ත්‍රිදෝෂ තත්වයන් හා ප්‍රකෘති තත්ත්වයන් අනුව සලකා බලා ප්‍රතිකාර කරීමට තීරණ ගැනීම වෛද්‍යවරුන් සතු වේ. බොහෝ විට මේ සඳහා ද කොරෝනා ප්‍රතිකාරයේ දී මෙන්ම ප්‍රතිශක්තිකරණ පද්ධතිය ශක්තිමත් කිරීම සඳහා වෛරසයට එරෙහිව පවතින ඖෂධ වර්ග උපයෝගී කරගැනීම සිදු කළ හැකිය.

කොරෝනා රෝගයට පසු වඳුරු උණ වෛරස් රෝගය පැතිරීමේ අවධානමට ලංකාව මේ වන විට මුහුණ දෙමින් සිටියි. මේ වන විට මෙරටින් වඳුරු උණ වෛරසයට ගොදුරු වූ දෙවැනි රෝගියාද හමුවී තිබේ. මේ ආකාරයට වඳුරු උණ වෛරසය ලංකාව ඇතුළු බොහෝ රටවල් ගණනක පැතිරීමේ අවධානමට ලක්ව ඇති බව වාර්තාවන දත්ත අනුව පෙනේ.

දැනටමත් ලොව පුරා සැලකිය යුතු රෝගීන් පිරිසක් මෙම රෝගයට ගොඳුරු වී සිටිත් දී එය අප රටට ද පැමිණීම ගැන අප විශේෂ අවධානය යොමු කළ යුතුය. මක්නිසාදයත් ශ්‍රී ලාංකිකයන් ලෙස අප මේ ගතකරමින් සිටින අවධිය ඉතාම දුෂ්කර අවධියක් වන බැවිනි. කුමන කාරණයක් නිසා හෝ මෙම වෛරසය ලංකාවේ ව්‍යාප්ත වීම වැඩි වුවහොත් එය අප කබලෙන් ලිපට වැටෙන තත්වයකට පත්වේ. ආර්ථික අපහසුතා හා මානසිකව අප සිටින තත්ත්වය මෙවැනි රෝග තත්ත්වයකදී ඉතාම හානිකර ලෙස අපගේ ජන ජීවිතයට බලපානු ලබයි. එනිසා වදුරු උණ වෛරසයෙන් ආරක්ෂාවීමට අප සෞඛ්‍ය පිළිවෙත් නිසිලෙස රැකිය යුතු වේ.

වඳුරු උණ රෝගයේ රෝග ලක්ෂණ

මෙම රෝගයේ දී අධික උණ පවතී. ශරීරයේ පවතින මස්පිඬුවල අධික වේදනාවක් හටගනී. සමේ ගෙඩි ඇතිවීම දක්නට ලැබේ. දද හා කුෂ්ට ලක්ෂණ සම තුළ දක්නට ලැබේ. මෙහිදී සෙම්ප්‍රතික්ෂාව ද පෙන්වයි. එමෙන්ම වසා ගැටිතිවල ඉදිමීම ද දක්නට ලැබේ. ඒ මෙය වෛරස් රෝගයක් බැවිණි. රෝගය ආසාදනය වීමෙන් දින 06 සිට දින 13 දක්වා කාලය තුළ රෝග ලක්ෂණ පෙන්වීම සිදු කරයි. එසේම මෙම රෝගය දින පහේ සිට දින 21 දක්වා කාලයක් රෝග ලක්ෂණ ඇති වීමේ හැකියාවක් ඇත. මුල් දින පහේ දී බොහෝ විට දැඩි උණ ගතිය හා දැඩි හිසරදය ඇති වන අතර වසා ග්‍රන්ථි ඉදිමීම, මාංශ පේශීවල වේදනාව හා ශරීරයේ ශක්තිය නැතිකම බහුලව දැනෙන්නට පටන් ගනී. මෙය මුල් දින පහේ දී සිදුවේ. ඉන්පසු උණ සමඟ ශරීරය කැසීම ආරම්භ වී බිබිළි ඇතිවීම සිදුවේ. මේවා විශාල බිබිළි ලෙස දක්නට ලැබේ. එම බිබිළි තුළ තරළ ස්පථක දක්නට ලැබේ. ඒවා පැහැදිළි දියර ස්වභාවයක් හා කහ පැහැති තරලමය සභාවක් දක්නට ලැබේ. මේවායින් තුවාල දෙක තුන හට ගෙන ශරීරය පුරා පැතිරෙයි.

රෝගය සඳහා ආයුර්වේද ප්‍රතිකාර

මෙය වර්තමානයේ පවතින නවතම රෝග තත්ත්වයකි. දේශීය මෙන්ම විදේශියව ද මේ සඳහා බොහෝ ප්‍රතිකාර අපට සොයාගත හැකි වනු ඇත. බටහිර මෙම රෝගී තත්ත්වය එන්නත්කරණය මඟින් සුව කළ හැකි බව පැවසේ. එය වසූරිය එන්නත ගත් පුද්ගලයන්ට නොසෑදෙන බව කියැවේ. එසේම නව එන්නත් ද ඇති බව වර්තමානයේ පැවසේ.

ආයුර්වේදයට අනුව මෙය ත්‍රිදෝෂ තත්වයන් හා ප්‍රකෘති තත්ත්වයන් අනුව සලකා බලා ප්‍රතිකාර කිරීමට තීරණ ගැනීම වෛද්‍යවරුන් සතු වේ. බොහෝ විට මේ සඳහා ද කොරෝනා ප්‍රතිකාරයේ දී මෙන්ම ප්‍රතිශක්තිකරණ පද්ධතිය ශක්තිමත් කිරීම සඳහා වෛරසයට එරෙහිව පවතින ඖෂධ වර්ග උපයෝගී කරගැනීම සිදු කළ හැකිය. ශ්‍රී ලංකාවේ මෙම වෛරසය ව්‍යාප්තිය පිළිබඳ අවධානය යොමු කළ යුතු වෙමු. රෝගය ඉතා භයානක නොවන බව දැක්වුව ද එයින් ඇතිවන සංකූලතා මිනිස් සිරුරට හානිකර බව පෙනේ.

මේ සඳහා විශේෂයෙන්ම සීතාරාම ගුළිය, රාමවාණ, ත්‍රිභඅනාකිර්ති රස මෘත්‍යුංජය ආදි බොහෝ පලි වර්ග දක්නට ලැබේ. එසේම බුද්ධ රාජ කල්කය,නවරත්න කල්කය ලියාදී චූර්ණය සීතෝදය චූර්ණය සීතෝපලදී චූර්ණ කෂාය ලෙස දේවදාර පස්පංගුව, නේපතී කෂාය, කච්චායනා ගරාදි කසාය වැනි කසාය වර්ග මෙහිදී යොදා ගත හැකිය. එසේම ප්‍රතිශක්තිය වර්ධනය කරන යෝග බොහෝ ප්‍රමාණයක් අපට දේශීයව හමුවේ. මේ සියල්ල ද අවශ්‍ය අවස්ථාවලදී ත්‍රිදෝෂ කෝප වීම සලකා බලා අවස්ථානුකූලව යෙදීම කළ හැකිය. විශේෂයෙන් මෙහිදී සඳහන් කළයුතු වන්නේ ඒකීය ඖෂධයක් මත විශ්වාසය නොතබා ඖෂධ පද්ධති මඟිින් රෝගය සුව කිරීමට උත්සහ කිරීම ඉතාම කාලෝචිත ක්‍රියාමාර්ගය බවයි. එසේම සඳහන් කළ යුතු වන්නේ පංචභුත මඟින් ජනිත ශරීරය තුළ දෝෂ තත්ත්ව අනුව විවිධාකාර රෝග එනම් නානාවිධ රෝග ඇති වන බවයි. එය වාත පිත්ත කදිර දෝෂ අනුව කථදී දෝෂ අනුව විග්‍රහ කර රෝගය තුරන් කිරීම සඳහා අවශ්‍ය ඖෂධ යොදා ඖෂධ යෝග යෙදීම කළ යුතුය.

රෝගයෙන් වැළකීමට ගත යුතු පියවර

කොරෝනා රෝගයේ දී මෙන්ම මෙයද බෝවන රෝග තත්වයකි. කොරෝනා තරම් භයානක නොවුණද ප්‍රතිශක්තිය අඩු පුද්ගලයින්ට මෙය හානිකර විය හැකිය. එබැවින් මෙම රෝගය වැළැක්වීම සඳහා අවශ්‍ය ක්‍රම අනුගමනය කිරීම ඉතාම මැනවින් සිදු කළ යුතුය.

මෙම වෛරසය ස්පර්ශය, දහඩිය හා කෙළ බිඳීති හරහා පැතිරී යයි. එබැවින් ඒවා ගෑවීම හා වැළැක්වීමේ ක්‍රියාමාර්ග ගත යුතුයි. විශේෂයෙන්ම ආසාදිත පුද්ගලයෙකුගේ පෞද්ගලික භාණ්ඩ ඇඳ ඇතිරිලි පිඟන් කෝප්ප වැනිදේ භාවිතා නොකළ යුතුය. එසේම එවැනි දේ ගෑවුණ හොත් හැකි ඉක්මනින් සබන් වතුර යොදා සේදීම සිදු කරන්න. බාහිරින් පැමිණෙන පුද්ගලයින් සමඟ (පිටරටින් පැමිණෙන) ආසාදිත රෝගීන් සේ සැකකෙරෙන පුද්ගලයින් සමඟ සම්බන්ධතා අවම කරන්න. හොඳ ආහාර රටාවක් හා පුද්ගල පවිත්‍රතාවය සහිතව නිරෝගී මනසක් සමඟ කලය ගත කරන්න. ප්‍රතිශක්තිය ඉහළ දැමීම සඳහා අවශ්‍ය ක්‍රියාමාර්ග ගන්න. රෝගය ශ්‍රී ලංකාවට පැමිණිය ද ආරක්ෂිත ක්‍රම ක්‍රියාමාර්ග මඟිින් රෝගය බෝවීම වළක්වා ගත හැකිය. එලෙසම කොරෝනා රෝගයේදී ආරක්ෂා වූවා සේම තව දුරටත් මුව ආවරණ මෙන්ම අත් ආවරණ පැළදීම මඟින් මෙම රෝගය ශරීරගතවීමෙන් ආරක්ෂාවිය හැකි බව වෛද්‍ය මතයයි.

බස්නාහිර පළාත් ආයුර්වේද දෙපාර්තමේන්තුවේ

වෛද්‍ය නිලධාරී

අභයතිලක දේවගිරි